The Web Saghir Blog

Monday, January 21, 2008

قصور بینظیر ک







صدر پرویز مشرف نےامریکی ٹی وی چینل سی بی ایس کوانٹرویو دیتے ہوئے اور باتوں کے ساتھ ساتھ یہ بھی کہا ہے کہ بینظیر بھٹو اپنی موت کی خود ذمہ دار ہیں۔انہیں گاڑی سے باہر نہیں نکلنا چاہیے تھا۔

صدر کے اس ارشاد کی روشنی میں نہ صرف بینظیر کیس بلکہ کئی دیگر تاریخی معمے بھی حل ہوگئے ہیں۔مثلاً خلیفہ راشد حضرت عمر بن خطاب اگر نمازِ فجر کے لیے مسجد جانے سے مستقل پرہیز کرتے تو کبھی بھی ایرانی غلام ابولولو فیروز کے خنجر کا شکار نہ ہوتے۔

حضرت علیٰ علیہ السلام نےاس واقعہ کے باوجود احتیاط نہ برتی اور محافظوں کے بغیر مسجد جاتے رہے۔ ظاہر ہے انہیں ایک نہ ایک روز ابنِ ملجم کے زہر میں بجھے خنجر کا نشانہ تو بننا ہی تھا۔

گاندھی جی کو آخر کیا پڑی تھی کہ انہوں نے ہر کس و ناکس کے لیے اپنا دروازہ کھول رکھا تھا۔اس بے احتیاطی کے بعد یہ کہنا سراسر زیادتی ہے کہ جن سنگھی نتھو رام گوڈسے کے پستول سے نکلنے والی گولیاں گاندھی جی کے قتل کی ذمہ دار ہیں۔

اگرحضرت عمر نماز پڑھنےنہ جاتے
مثلاً خلیفہ راشد حضرت عمر بن خطاب اگر نمازِ فجر کے لیےمسجد جانے سے مستقل پرہیز کرتے تو کبھی بھی ایرانی غلام ابولولو فیروز کے خنجر کا شکار نہ ہوتے۔

لیاقت علی خان کو کیا سوجھی کہ سولہ اکتوبر انیس سو اکاون کو راولپنڈی کے کمپنی باغ میں بھرے جلسے سے خطاب کے شوق میں سید اکبر کے ریوالور کے سامنے آگئے۔اسی لیے آج تک لیاقت علی کے قتل کا ذمہ دار سوائے ان کے کوئی اور نہ ٹھہرایا جا سکا۔

ضیا الحق کو کس حکیم نے مشورہ دیا تھا کہ وہ سترہ اگست انیس سو اٹھاسی کو سی ون تھرٹی طیارے میں سفر کریں۔شاید اسی لیے آج تک ان کی موت کا ذمہ دار خود انہیں سمجھا جاتا ہے۔

اسی طرح مرتضٰی بھٹو کو یہ کیا سوجھی کہ وہ بیس ستمبر انیس سو چھیانوے کو اپنے گھر لوٹتے ہوئے گولیوں کا نشانہ بن گئے۔کیا وہ اگلے دن تک واپسی کے لیے صبر نہیں کرسکتے تھے۔شاید اسی لیے آج تک ان کے قتل کی ذمہ داری کسی اور پر نہیں ڈالی گئی۔

اور اب سے چھ ماہ قبل سپریم کورٹ کے ایڈیشنل رجسٹرار حماد رضا اگر اپنے ہی گھر کے بیڈ روم میں سونے سے پرھیز کرتے تو آج ہمارے درمیان ہوتے۔

اور خود صدر مشرف کو چودہ دسمبر دو ہزار تین کو راولپنڈی کے جھنڈا چیچی پل پر سے گزرنے کی کیوں ضرورت پڑی۔اگر پل کے ساتھ ساتھ خدانخواستہ ان کی گاڑی بھی اڑ جاتی تو ذمہ دار کون ہوتا۔

لگتا ہے کہ صدر مشرف کو اسوقت کسی نے یہ بتانے کی جرات نہیں کی کہ غلطی آپ کی ہے ورنہ اس حملے کے دس روز بعد پچیس دسمبر کو سڑک پر نکل کر دوسرے خودکش حملے کا نشانہ نہ بنتے۔

ہمیں حیرت ہے کہ صدر کی غلطی پکڑنے کے بجائے تحقیقاتی ایجنسیوں نے آٹھ افراد کو نہ صرف پکڑا بلکہ کورٹ مارشل کے ذریعے ان میں سے پانچ کو سزائے موت اور تین کو سزائے قید بھی سنا دی گئی۔

لیکن اب جبکہ صدر پرویز مشرف اس نتیجے پر پہنچ ہی گئے ہیں کہ بینظیر بھٹو کا قتل خود بینظیر کی غلطی کے سبب ہوا ہے تو یہ بحث فضول ہے کہ انہیں بیت اللہ محسود نے مارا، کسی ایجنسی کا شکار ہوئیں یا اپنوں کی بھینٹ چڑھ گئیں۔

صدر کو چاہیے کہ سکاٹ لینڈ یارڈ کی ٹیم کو بھی اب جلد از جلد روانہ کردیں تاکہ قوم اور قومی خزانہ اور زیربار نہ ہوں۔

ایک دلچسپ ملک


اس ملک میں حمود الرحمان کمیشن نام لے لے کر ذمہ دار ٹھہراتا ہے کہ فلاں کا مشرقی پاکستان میں یہ کردار تھا، فلاں نے یہ کیا اور فلاں نے کس کس موقع پر انتہائی غیر ذمہ داری کا ثبوت دیا۔لیکن ہوا کیا۔کچھ ملزم خاموشی سے ریٹائر ہوگئے۔کچھ وزیر یا سفارتکار بن گئے اور کچھ نے اپنی یادداشتیں لکھ کر صفائی پیش کی اور کتاب کی رائلٹی بھی وصول کرلی۔

یہاں انیس سو اٹھاسی میں آئی جے آئی بنوانے والے اور مہران گیٹ سکینڈل کے سب کردار ماسوائے غلام اسحاق خان زندہ ہیں۔ان میں سے کچھ حضرات شواہد اور عدالتی گواہیوں کے باوجود مختلف اداروں کے کنسلٹینٹ ہیں۔کچھ حالاتِ حاضرہ کے مبصرین کی کھال اوڑھے بیٹھے ہیں اور بعض تھنک ٹینکس بنا کر ملک و قوم کی حالت پر آنسو بہا رہے ہیں۔

یہاں مرتضی بھٹو قتل کیس گیارہ برس سے عدالتی فائیلوں میں سو رہا ہے۔اس کیس میں ماخوذ بیشتر اہلکار اور شخصیات یا تو ترقی پا چکے ہیں، یا ریٹائر ہوچکے ہیں یا پھر فوت ہوگئے ہیں۔نہ کوئی بری ہوا نہ کسی کو سزا ملی۔

انیس سو ننانوے میں کارگل کے پہاڑوں پر کیوں چڑھائی کی گئی۔اتنے فوجی کس مقصد کے لئے مرے۔حکمتِ عملی کا خالق کون تھا ۔سب کردار زندہ ہیں بلکہ پہلے سے زیادہ باعزت اور طاقتور انداز میں زندہ ہیں۔کارگل تحقیقاتی کمیشن نہیں بننے دیا گیا۔ویسے بن بھی جاتا تو کیا کرلیتا۔

لال مسجد واقع کا ذمہ دار کون؟
لال مسجد اسلام آباد میں اسلحہ جمع کرنے والوں کو سات ماہ تک کس نے سلیمانی ٹوپیاں فراہم کیں۔اور جب رائی کا پہاڑ بن گیا اور سو سے زائد لوگ مارے گئے تو کیا یہ سب خود بخود ہوگیا یا کوئی ادارہ یا اہلکار بھی تھوڑا بہت ذمہ دارتھا۔
وزیرستان میں قبائلیوں پر چڑھائی کی حکمتِ عملی کس نے بنائی۔پھر انہی قبائلیوں کے رہنماؤں کو دہشت گرد قرار دے کر ہار پھول پہنا کر امن معاہدے کس کے کہنے پر ہوئے اور یہ معاہدے کس کے حکم پر توڑے گئے۔

ان دھشتگرد سرغنوں کو خفیہ فنڈ سے لاکھوں روپے کس نے ادا کئے اور پھر یہ رقم حاصل کرنے والوں نے فوجیوں کو کیوں اغوا اور قتل کرنا شروع کردیا۔اور سوات میں ایک حجرے سے نشریات شروع کرنے والے ایف ایم ریڈیو ٹرانسمیٹر نے پورے ضلع کو کس کی آنکھوں کے سامنے ایک جہادی کش مکش میں جھونک دیا۔کیا آج تک مذکورہ مہم جوئی اور بد انتظامی کی ذمہ داری کسی کمانڈر یا پولٹیکل ایجنٹ یا سرکاری سیاستداں نے اپنے سر لی۔کیا کسی سے پوچھ گچھ ہوئی۔

لال مسجد اسلام آباد میں اسلحہ جمع کرنے والوں کو سات ماہ تک کس نے سلیمانی ٹوپیاں فراہم کیں۔اور جب رائی کا پہاڑ بن گیا اور سو سے زائد لوگ مارے گئے تو کیا یہ سب خود بخود ہوگیا یا کوئی ادارہ یا اہلکار بھی تھوڑا بہت ذمہ دارتھا۔کیا سب کچھ مرنے والوں کے ساتھ قبر میں دفن ہوگیا۔

سٹاک ایکسچینج میں مارچ دو ہزار پانچ میں تیرہ ارب روپےڈوب گئے۔وزیرِ اعظم شوکت عزیز یہ وضاحت کئے بغیر کیسے ملک چھوڑ گئے کہ اس بدقسمت مالیاتی دن کا ریکارڈ کہاں اور کس نے کس کے حکم پر غائب کردیا۔

ایمرجنسی غیر آئینی مگر ضروری
صدر پرویز مشرف نے سینہ ٹھونک کر کہا کہ تین نومبر کو ایمرجنسی کا نفاز ایک غیر آئینی اقدام تھا لیکن اس کا نفاز ایک مجبوری تھی۔
صدر مشرف
صدر پرویز مشرف نے سینہ ٹھونک کر کہا کہ تین نومبر کو ایمرجنسی کا نفاز ایک غیر آئینی اقدام تھا لیکن اس کا نفاز ایک مجبوری تھی۔کس عدالت میں ہمت ہے کہ صدر کے اس بیان کا ازخود نوٹس لیتی۔

بے نظیر بھٹو کے قتل کے بعد جائے حادثہ کو دو گھنٹے میں فائر بریگیڈ کے پانی نے دھو دیا۔صدر مشرف نے کہا یہ غلطی تھی۔آج تک یہ کیوں نہیں پتہ چل سکا کہ کس کی غلطی تھی اور اس کے خلاف کیا کاروائی ہوئی۔

صدر مشرف نے کہا بینظیر کو بینظیر کی غلطی نے مار ڈالا۔وزیرِ داخلہ نے کہا گولی لگنے سے موت ہوئی۔ان کی وزارت کے ترجمان نے کہا لینڈ کروزر کا لیور لگنے سے موت ہوئی۔پھر کہا گیا کہ ترجمان ایک سیدھے سادے فوجی ہیں لہذا جلد بازی میں یہ سب کہہ گئے۔کوئی اور ملک ہوتا تو ان تینوں سیدھے سادے فوجیوں کو تحقیقات غلط رخ پر ڈالنے کے الزامات کا سامنا کرنا پڑتا لیکن سب اپنی اپنی جگہ موجود ہیں۔

اگر یہاں کسی کا احتساب ہوسکتا ہے تو افتخار چوہدری اور اعتزاز احسن جیسوں کا ہوسکتا ہے جنہوں نے اس نظام کی نفسیات سمجھنے میں شدید غلطی کی ۔

اگر کسی نے صحیع معنوں میں اس نظام کو سمجھا ہے تو وہ بیت اللہ محسود اور مولانا فضل اللہ جیسے لوگ ہیں۔۔۔۔۔ہے نا پاکستان ایک دلچسپ ملک !!!

Wasi Zafar And Ch Shujaat Hussain